h
Balth&Melch

Meansen die domme of rare dinge doet

Gemekker van Melchior

01-06-2015

Soms doet meansen domme  dinge. Dat heb ik een posie eleen ok edoan, in een domme buuje, dat wil zeggen nog dommer as gewoonlijk dus, heb ik een column eschreven oaver de voedselbaanke in Roalte. Wat doar dom an is? Nou, zo heb ik miezelf wat te doen emaakt want noe deankt de webmaster natuurlijk dat ik regelmoatig achter het toestenbord van mien computer goa zitten um weer een nieuwe column te schrieven. Op mien toetsenbord stoat letters zat, dat is niet het probleem mar ze stoat niet in de goeie volgorde en het is soms bes wel een flink karwei  um ze goed in de riege te kriegn veur een column.
Der bint teegnwoordig navigatiecomputertjes die oe de weg wiest aj met de auto van Groningen noar Gennep of van  Dokkum  noar Domburg wilt, ie hoeft zelf de weg niet meer te weetn, dat weet de computer wel. Piloten zet in hun vliegtuug de atomatische piloot an en dan weet de computer wel noar welk vliegveld het het hele spul  hen mut. Der bint oaveral computers veur en Ik bin noe op zuuk noar een computer die automatisch columns kan schrieven, zo'n ding wil ik mie anschaffen. Zo gauw ik zo'n apparaat hebbe kan de webmaster zovölle columnns kriegn asse hebben wil. Of is dat een dom  idee?

Gelukkig veur mie bint der wel meer meansen die domme of rare dinge doet, denk mar an die man op stelten, ik bedoele Opstelten, minister Opstelten.  Joarenlang was die man vergetten dat de officier van justitie Fred Teeven zowat vief miljoen euro an een crimineel had betaald. Vief miljoen uut de staatskas an een crimineel betaaln dat vin ik echt alderbassend dom en  het  is ok gin bedrag daj zo mar könt vergetten. Toen het Opstelten eindelijk weer te binnen scheut was het geen Opstelten meer mar Opstappen. En Fred Teeven, inmiddels staatssecretaris, mos gewoon mee op stap met de minister. Noe bint ze allebei ex. Mar woarum kreeg die crimineel zovölle geld? Nou, ik deanke gewoon um mekaar te helpen, participatie heet dat in het Haags. Kiek, as der gin criminelen waarn zoln alle officieren van justitie zonder werk zitten,  dan komt ze in de bijstand en mut der weer een teegnprestatiebaantje veur worn ezöch. Völ te lastig allemoal, gewoon de status quo handhaven. Of zoas wie in Roalte zegt: gewoon loaten zoas het is.

Ik heb eheurd dat der plannen bint um een tunnel te bouwen onder het spoor en de N35 bie kruuspunt Bos. Dat is zeker gin dom  idee mar het is wel dom um te deanken dat wie doar binnenkort  met de auto of de fietse onder de N35 deur könt. In Nijverdal hebt ze ervaring met tunnels, ze weet der noe alles van. Joaren eleen kwam een zekere Leo ten Brinke met het idee um in Nijverdal een tunnel te bouwen. Bestuurders en politici, die dat eigenlijk zelf ok wel han können bedeanken,  bint toen direct hard an't werk egoan met dat idee en noe, nog mar veertig joar later, is die tunnel al kloar. Nou ja, de tunnel is wel kloar mar ie könt der nog niet deur want de beveiliging werkt nog niet. Een bettie dom gepruts misschien? Ze zegt dat het dit joar nog allemoal in orde kump. Dat hoppe wie dan mar.
Het is trouwens wel een bettie raar egoan met die tunnel in Nijverdal. Meestal wördt een tunnel deur een berg hen eboord zodaj niet met de auto of de fietse teegn die berg hoeft op te klimmen. Mar in NIjverdal han ze de berg al weg egraven en der een ravijn van emaakt, een berg um deur hen te boorn was der op die plekke niet meer, de tunnel is noe ebouwd midden in het dorp op een plekke woar nooit een berg is ewes. Het is wel allemoal heel mooi in orde ekommen. Het hef een paar cent ekost maar dan hej ok wat. Nijverdal hef noe een ravijn en een tunnel mar... aj van Nijverdal noar roalte wilt met de auto dan muj net as vrogger toch nog oaver de berg! Dom of niet dom?

As de tunnelbouw bie kruuspunt Bos net zo gauw geet as in Nijverdal dan köj doar al umstreeks het joar 2055 deur een tunnel onder de N35 deur. Mooi  veuruutzicht toch.

Melchior.

U bent hier